Los Sendareus de l'auba - Martial Peyrouny

« Tot quò-quí es verai, puei que sei un personatge de ficcion » (Ester Lapoja)
Nascuda de l’imaginacion de son autor, Ester Lapoja es una goiata d’au jorn d’aüei, plan esbarbida, eleva au liceu Bertran de Bòrn de Perigüers. Benaisa dins sa vita, energica, telefonet en mans, Ester nos fai viure coma sos amics e sas amijas tres enquestas de reng : « Un tant doç vonvon »,  « Los Sendareus de l’auba » e « Ventar dau vent que bufa ». Dins son monde, plan realista e pròche de quò nòstre, la goiata es plan afarada emb la màfia georgiana, daus nazilhons, los autonomistas perigòrds, las sectas, daus fascistas regatiers de dròga... La jòuna enquestritz, que se’n laissa pas contar, fai virar chabra lo famós comissari Alexandre Darnaudguilhem, plan conegut dins la capitala de Nauta Dordonha en Occitània.
Enfant de Perigòrd, Martial Peyrouny signa aquí son prumier libre, emb quauquas clinhadas a l’òbra policiera de Joan Ganhaire. Son eroïna li fuguet inspirada per son experiéncia de professor d’occitan a la Ciutat escolara Bertran de Bòrn a Perigüers. Fuguet pendent longtemps co-animator coma Joan Pau Verdier de l’emission occitana setmaniera “Meitat chen, meitat pòrc” sus França Blu Perigòrd (aüei, Ici Périgord).